Bardh Spahia ka kritikuar qeverinë për fondet e parashikuara për shëndetësinë në projektbuxhetin e vitit 2027, duke akuzuar mazhorancën se po lë pacientët në mëshirë të fatit dhe po i detyron familjet të mbështeten te fushatat e bamirësisë për të përballuar sëmundjet e rënda.
“Jeta e shqiptarëve nuk është një link në ‘GoFundMe’!”, shkruan ai në një reagim publik, ku ngre shqetësime për financimin e sistemit shëndetësor dhe mungesën e medikamenteve jetike, veçanërisht për pacientët me sëmundje tumorale.
Sipas Spahise, fondi i sigurimeve shëndetësore në projektbuxhetin e vitit 2027 parashikohet të rritet me vetëm 1.5%, ndërsa inflacioni, sipas tij, është 3%. Ai argumenton se kjo rritje nuk mjafton për të përballuar kostot në rritje dhe për të garantuar furnizimin me barna.
Kritika e tij përqendrohet edhe te investimet kapitale, për të cilat pretendon se buxheti parashikon një rritje prej 14.4%. Spahia akuzon qeverinë se po u jep përparësi investimeve infrastrukturore dhe tenderave, në dëm të nevojave të pacientëve.
Në përfundim të reagimit, ai u bën thirrje qytetarëve të kundërshtojnë politikat e qeverisë, duke e cilësuar situatën si braktisje të pacientëve dhe keqpërdorim të parave publike.
