Trazirat që shpërthyen të enjten në dy institucione penitenciare të Ekuadorit rezultuan me tetë të burgosur të vrarë dhe 10 të plagosur.
Autoriteti i burgjeve, SNAI, bëri të ditur se në burgun e Latacunga, që ndodhet në provincën Cotopaxi, humbën jetën katër persona. Po ashtu, katër të burgosur të tjerë u vranë në El Inca, një burg në kryeqytetin Quito. Të plagosurit janë duke marrë kujdes shëndetësor.
Autoritetet informuan gjithashtu se të dyshuarit për përfshirje në këto trazira janë identifikuar dhe parashikohet që ata të transferohen drejt institucionit të sigurisë së lartë El Encuentro, që ndodhet në provincën Santa Elena.
Forcat e policisë po vazhdojnë ndërhyrjet në të dy burgjet me qëllim rivendosjen e rendit dhe të kontrollit.
Burgjet në Ekuador janë shpesh skenë e përplasjeve të dhunshme mes grupeve kriminale rivale, duke regjistruar valë masakrash që prej vitit 2021.
