Parlamenti grek ka miratuar një ligj që ndalon fëmijët nën moshën 15-vjeçare të kenë qasje në rrjetet sociale, duke vendosur rregulla të reja të forta që do të hyjnë në fuqi më 1 janar 2027. Votimi u zhvillua gjatë një seance që përfundoi herët në mëngjes të premtes, më 23 tetor.
Sipas procesverbalit të Parlamentit, projektligji u miratua me shumicën e votave. Partia në pushtet, Demokracia e Re, e mbështeti nismën, ndërsa PASOK-u u shpreh “i pranishëm” gjatë votimit për të gjithë projektligjin. Të gjitha partitë e tjera që morën pjesë votuan kundër, njofton “Greekreporter”.
Vendimi i fundit bën që kufizimet e paralajmëruara nga qeveria për rrjetet sociale të përfshihen tashmë në legjislacionin zyrtar. Përgjegjësia për verifikimin e moshës së përdoruesve tani bie mbi platformat e rrjeteve sociale, duke hequr barrën nga prindërit.
Një element i veçantë i ligjit është mënyra e llogaritjes së moshës. Sipas dispozitave, 1 janari do të trajtohet si data e lindjes për të gjithë ata që kanë lindur në të njëjtin vit kalendarik. Kështu, për shembull, të gjithë fëmijët e lindur në vitin 2012 do të konsiderohen 15-vjeçarë që nga janari 2027, pavarësisht se kur kanë ditëlindjen gjatë atij viti.
Ofruesit e shërbimeve kanë mundësinë të verifikojnë moshën e përdoruesve përmes aplikacioneve “Kids Wallet” ose “Gov.gr Wallet”. Sidoqoftë, ligji nuk e detyron përdorimin e ndonjë aplikacioni specifik—çdo metodë tjetër duhet të plotësojë kërkesat për besueshmëri, proporcionalitet dhe mbrojtje të privatësisë.
Ministria e Qeverisjes Digjitale ka theksuar se procesi i verifikimit duhet të konfirmojë vetëm nëse përdoruesi ka moshën e lejuar, pa i transferuar platformave të dhëna të panevojshme personale.
Qeveria e Greqisë e ka prezantuar këtë nismë si përpjekje për të reduktuar pasojat negative të përdorimit të internetit te të miturit dhe për të përkrahur familjet. Kjo masë vjen pas një sërë politikash të tjera, përfshirë kufizimet për përdorimin e celularëve në shkolla.
Gjatë diskutimeve në Parlament, PASOK-u propozoi që fëmijët 13 dhe 14-vjeçarë të mund të hapin llogari të kufizuara në rrjetet sociale, por vetëm nën mbikëqyrjen e prindërve.
Ndërkohë, qeveria mbetet e angazhuar për të ruajtur një prag të unifikuar të moshës në nivel kombëtar, duke ndjekur në të njëjtën kohë përpjekjet për krijimin e një kornize të përbashkët evropiane për çështjet e sigurisë digjitale të të miturve.
