Kryeministri i Kosovës, Albin Kurti, gjatë një konference të jashtëzakonshme për shtyp, deklaroi se procesi i zgjedhjes së presidentit të vendit dhe mbrojtja e ish-krerëve të UÇK-së përbëjnë dy çështje të veçanta.
Kurti theksoi se, nëse presidenti i ri i Kosovës nuk zgjidhet deri në afatin që përfundon sonte në mesnatë, vendi nuk do të ketë mundësi të ofrojë ndihmën e nevojshme për katër ish-udhëheqësit e UÇK-së në apelimin kundër vendimit të shkallës së parë për dënimet e shqiptuara nga Gjykata Speciale në Hagë për krime lufte.
“Për katër të dënuarit, ne besojmë se duhet të ketë korrigjim në Apel, ndërsa, në anën tjetër, kemi nevojë për një strategji shtetërore e kombëtare. Moszgjedhja e Presidentit na çon drejtpërdrejt në zgjedhje. Por jo vetëm që na çon në zgjedhje, ajo na kufizon edhe mundësinë që të merremi me strategjinë shtetërore dhe me çështjen e apelit”, tha Kurti.
Kryeministri u shpreh gjithashtu se trajtimi i apelit nuk mund të shtyhet për vitin e ardhshëm, por duhet të adresohet brenda këtij muaji.
“Pa President, sot Kosova rrezikon të mbetet për muaj të tërë në zgjedhje dhe pa institucione funksionale. Prandaj, çështja e zgjedhjes së Presidentit është emergjente”, shtoi ai.
