Gjatë vizitës së tij në Shkodër, ministri Ervin Demo ka vlerësuar me dekorata dy punonjës të Policisë së Shtetit, Elisa Elez Hasanaj dhe Rigers Sekja, për profesionalizmin dhe përkushtimin e treguar gjatë ushtrimit të detyrës.
Hasanaj, e cila shërben si operatore e sistemit të kamerave në Stacionin e Policisë Kufitare Hani i Hotit, dhe Sekja, efektiv i Forcave të Posaçme “Shqiponja”, u nderuan për angazhimin e tyre në përmbushjen e përgjegjësive dhe në shërbim të qytetarëve.
Të dy punonjësit kanë rreth tre vite eksperiencë në Policinë e Shtetit dhe, sipas vlerësimit të bërë gjatë ceremonisë, përfaqësojnë shembuj të përkushtimit dhe korrektësisë në detyrë.
