Ipeshkvijtë e dioqezave katolike në Shqipëri janë mbledhur në Shkodër për Asamblenë e 78-të të zakonshme të Konferencës Ipeshkvnore të Shqipërisë.
Punimet po zhvillohen në Seminarin Ndërdioqezan Shqiptar, ku në qendër të diskutimeve janë çështje që lidhen me jetën e Kishës në vend, misionin baritor dhe sfidat me të cilat përballen komunitetet katolike.
Një pjesë e rëndësishme e takimit lidhet me përgatitjet për Vizitën “Ad Limina Apostolorum” në Romë, që ipeshkvijtë shqiptarë pritet ta zhvillojnë në fund të këtij muaji. Gjatë vizitës, ata do të paraqesin pranë Selisë së Shenjtë gjendjen dhe veprimtarinë e Kishës në Shqipëri, si dhe prioritetet dhe sfidat për periudhën në vijim.
Në axhendën e vizitës është edhe takimi me Papën, në një moment të rëndësishëm për ipeshkvijtë shqiptarë dhe Kishën katolike në vend.
Gjatë Asamblesë në Shkodër po diskutohet edhe puna e komisioneve të Konferencës Ipeshkvnore, krahas disa prej zhvillimeve dhe ngjarjeve kryesore të Kishës universale.
Mes temave të trajtuara janë procesi sinodal, Dita Botërore e Rinisë, si dhe përvjetori i Lumnimit të martirëve shqiptarë. Ipeshkvijtë po shqyrtojnë edhe mënyrën se si këto ngjarje janë përjetuar dhe po përcillen në komunitetet katolike në Shqipëri.
Takimi në Shkodër shërben si një moment koordinimi dhe reflektimi për drejtuesit e Kishës katolike në Shqipëri, në prag të Vizitës “Ad Limina Apostolorum” dhe takimit me Papën në Romë.
