Pamjet e Tamarës në vjeshtë janë përdorur nga Florida Peraj, kryetare e Partisë Socialiste në Malësinë e Madhe, për të promovuar bukuritë natyrore të Kelmendit.
Në postimin e saj, Peraj sjell disa momente nga një ditë tetori në Tamarë, ku bien në sy ngjyrat e stinës dhe prania e vizitorëve.
“Një ditë tetori plot jetë në Tamarë. Plot vizitorë, ngjyra vjeshte dhe bukuria e Kelmendit që të fton ta vizitosh në çdo stinë”, shkruan ajo.
Përmes këtij postimi, Peraj u bën thirrje vizitorëve të përfshijnë Kelmendin në udhëtimet e tyre, duke veçuar natyrën dhe mikpritjen e zonës.
“Eja zbuloje edhe ti Kelmendin, natyra, mikpritja dhe bukuritë e tij të presin”, shprehet Peraj.
Tamara është një nga pikat më të njohura të Kelmendit dhe prej vitesh është kthyer në një destinacion të preferuar për turistët që vizitojnë veriun e Shqipërisë.
