Në qytetin Madrigueras të provincës Albacete në Spanjë, një grua 102-vjeçare vdiq dhe rreth 90 persona u shpëtuan të premten, pasi një përmbytje e befasishme përfshiu zonën.
Sipas informacionit të dhënë nga qeveria rajonale, në zonë ranë 142 litra shi për metër katror, çka bëri që autoritetet të ndërmerrnin një operacion të zgjeruar emergjence. Në të njëjtën kohë, u vu në zbatim Plani i Rrezikut të Pafavorshëm Meteorologjik (METEOCAM), në nivelin operacional 1.
E moshuara u gjet pa jetë në shtëpinë e saj, ku niveli i ujit kishte arritur afro një metër. Gjatë orëve të pasdites dhe natës, ekipet e emergjencës realizuan afërsisht 90 ndërhyrje shpëtimi, duke ndihmuar kryesisht banorët e izoluar në banesa të përmbytura.
Autoritetet njoftuan se morën qindra thirrje nga banorë të trembur të cilët kërkuan ndihmë dhe udhëzime për veprimet që duhej të ndiqnin gjatë situatës së jashtëzakonshme.
Kryeministri i Spanjës, Pedro Sánchez, shprehu ngushëllimet e tij për familjarët e viktimës, ndërsa deklaroi solidaritetin me komunitetin e prekur nga fatkeqësia. Në të njëjtën kohë, presidenti i Castilla-La Mancha, Emiliano García-Page, ndodhet në Madrigueras, ku Garda Civile vazhdon të punojë për pastrimin dhe menaxhimin e pasojave të përmbytjes.
