Një aksident ka ndodhur mesditën e sotme te Kthesa e Kamzës, ku një autobus i linjës Vorë-Tiranë është përplasur me një bordurë dhe ka përfunduar mbi trotuar.
Sipas informacioneve paraprake, aksidenti ka ndodhur në momentin kur autobusi sapo ishte larguar nga stacioni në drejtim të kryeqytetit. Menjëherë pas mbylljes së dyerve, pasagjerët kanë dëgjuar një zhurmë përplasjeje në anën e majtë të drejtuesit të mjetit.
Më pas, autobusi ka goditur bordurën përgjatë gjithë gjatësisë së tij dhe ka përfunduar mbi trotuar. Pasagjerët, të alarmuar nga përplasja, kanë dalë menjëherë nga autobusi.
Në vendngjarje kanë mbërritur shërbimet e policisë, si dhe përfaqësues të linjës së autobusit, të cilët po punojnë për të përcaktuar rrethanat dhe shkaqet e aksidentit.
Ndërkohë, për verifikim është ndaluar edhe një automjet tjetër, i cili dyshohet se mund të jetë përfshirë në aksident.
