Anëtari i Këshillit Bashkiak të Shkodrës nga radhët e PD-së, Florjan Bjanku, ka reaguar pas kritikave të marra në mbledhjen e këshillit dhe në rrjetet sociale për qëndrimin e tij kundër emërtimit të Dukagjinit dhe Velipojës si qytete në kuadër të reformës së re territoriale.
Bjanku, i cili votoi kundër dhënies së pëlqimit për reformën e propozuar, ka kundërshtuar pretendimet se deklarata e tij lidhet me paragjykime krahinore. Ai argumenton se Dukagjini dhe Velipoja e kanë tashmë Shkodrën si qendrën e tyre kryesore administrative, ekonomike, kulturore dhe shoqërore.
Në reagimin e tij, Bjanku thekson se statusi i qytetit nuk përcaktohet vetëm nga një emërtim administrativ, por edhe nga infrastruktura, shërbimet, dendësia e popullsisë dhe aktiviteti ekonomik.
Sipas tij, reforma e re territoriale nuk i zgjidh problemet e Bashkisë Shkodër nëse nuk shoqërohet me më shumë autonomi vendore, decentralizim fiskal dhe përfaqësim të banorëve. Ai ngre gjithashtu pikëpyetje nëse komunitetet e Dukagjinit dhe Velipojës janë konsultuar realisht për propozimin që zonat ku ata jetojnë të marrin statusin e qytetit.
Bjanku shprehet se, nëse banorët kërkojnë një status të veçantë, zëri i tyre duhet të dëgjohet, ndërsa vendimmarrja nuk duhet të mbështetet vetëm te propozimet institucionale.
Në fund të reagimit, anëtari i Këshillit Bashkiak e përmbledh qëndrimin e tij me pyetjen nëse këto zona kanë më shumë nevojë për një emërtim të ri apo për përfaqësim më të mirë dhe shërbime më pranë qytetarëve.
Për të mbështetur qëndrimin e tij, Bjanku i është referuar edhe një artikulli të botuar në revistën Monitor në tetor 2025, ku trajtonte pabarazinë territoriale dhe përfaqësimin e zonave nga Velipoja në Theth.
Reagimi i tij vjen në një kohë kur propozimet për riorganizimin territorial të Shkodrës kanë nxitur debate në Këshillin Bashkiak dhe në o
pinionin publik.
