Në zemër të Alpeve Shqiptare është rihapur një nga atraksionet më të veçanta turistike në veri të vendit. Thethi Zipline ka nisur zyrtarisht sezonin e ri turistik, duke u ofruar vizitorëve një eksperiencë plot adrenalinë mbi peizazhet mahnitëse të Thethit.
Me një gjatësi prej 1200 metrash, zipline-i u jep turistëve mundësinë të “fluturojnë” mbi luginën alpine, ndërsa shijojnë pamje panoramike të maleve, lumit të Thethit dhe shtëpive tradicionale karakteristike të zonës.
Një nga elementët më tërheqës të këtij atraksioni është mundësia që dy persona të zbresin njëkohësisht, duke e kthyer aventurën në një eksperiencë të veçantë për miq, çifte apo familjarë.
Përveç adrenalinës, vizitorët mund të eksplorojnë edhe Theth, një nga destinacionet turistike më të frekuentuara në Shqipëri, i njohur për natyrën e egër, historinë dhe traditat alpine.
Rihapja e “Thethi Zipline” pritet të shtojë fluksin e turistëve gjatë sezonit veror, duke e kthyer edhe më shumë zonën në një pikë të rëndësishme të turizmit aventurier në Shqipëri.
