Shtëpia e të Moshuarve në Shkodër po zgjeron shërbimet shëndetësore që ofrohen pa pagesë për rezidentët e saj. Aktualisht, në këtë institucion qëndrojnë 65 persona mbi 60 vjeç.
Qendra, e cila funksionon nën varësinë e Shërbimit Social Shtetëror, ka krijuar mundësi për ofrimin e shërbimeve nga mjekë dhe specialistë të ndryshëm brenda ambienteve të saj. Kjo u mundëson të moshuarve të marrin kujdesin e nevojshëm shëndetësor pa pasur nevojë të largohen nga institucioni.
Rezidentët shprehen të kënaqur me kushtet e akomodimit, ndërsa vlerësojnë edhe kujdesin dhe asistencën që marrin gjatë përditshmërisë.
Shtëpia e të Moshuarve në Shkodër pret persona nga qytete të ndryshme të vendit dhe prej vitesh funksionon në kapacitet të plotë. Ndërkohë, numri i kërkesave për akomodim vijon të jetë i lartë.
Kjo situatë evidenton nevojën për më shumë hapësira, shërbime dhe investime për të moshuarit, veçanërisht për ata që kanë nevojë për mbështetje dhe përkujdesje të vazhdueshme.
