Gjykata e Posaçme Kundër Korrupsionit dhe Krimit të Organizuar (GJKKO) ka lëshuar një urdhër arresti për drejtoreshën e Shërbimeve Sekrete të Shqipërisë, Vlora Hyseni, e cila është me origjinë nga Kosova.
Kjo masë sigurie vjen si pjesë e një hetimi për korrupsion që lidhet me tenderët e Agjencisë Shtetërore për Sistemet Informatike, ku është përfshirë edhe biznesmeni Ergys Agasi. Agasi, që kishte shmangur autoritetet për disa muaj, u kap në gushtin e kaluar.
Urdhri i arrestit për Hysenin nuk është zbatuar deri tani, ngaqë ajo ndodhet jashtë Shqipërisë. Mediat raportojnë se Hyseni dyshohet për “zbulim të sekreteve shtetërore”.
Gjatë hetimeve është përfshirë edhe ish-drejtori i përgjithshëm i Policisë së Shtetit, Ilir Proda. Policia ka kontrolluar banesën e tij dhe i ka sekuestruar telefonin, por nuk është marrë asnjë masë sigurie ndaj tij.
Ndërkohë, janë arrestuar drejtuesi i laboratorit të policisë shkencore si dhe një ekspert kriminalist.
Prokuroria e Posaçme, e cila po udhëheq hetimet, nuk ka dhënë ende një deklaratë zyrtare mbi këtë rast.
