Kryetari i Bashkisë së Shkodrës, Benet Beci, ka vlerësuar 10-vjetorin e Muzeut Kombëtar të Fotografisë “Marubi”, duke e cilësuar atë si një nga projektet më të rëndësishme kulturore për qytetin.
Përmes një postimi publik, Beci shprehet se muzeu është një nga veprat që e bën më krenar për Shkodrën, ndërsa thekson se ai dëshmon se kur ekziston një ëndërr dhe punohet fort për të, projektet marrin jetë.
Sipas tij, suksesi i “Marubit” i jep më shumë besim edhe projekteve të tjera kulturore që po zhvillohen aktualisht në qytet, si Muzeu i Lundrimit dhe tre muze të tjerë që pritet t’i shtohen Shkodrës në të ardhmen.
Beci thekson se kultura, muzetë dhe historia janë pjesë e identitetit të qytetit dhe duhet t’u trashëgohen brezave, për ta bërë Shkodrën gjithnjë e më krenare me rrënjët e saj.
