Një operacion antidrogë i zhvilluar në Laç ka çuar në arrestimin e dy të rinjve, të dyshuar për shpërndarje të lëndëve narkotike.
Në kuadër të operacionit të koduar “Destinacioni”, policia arrestoi Gabriel Malasin, 28 vjeç, banues në Lushnjë, dhe Skerdi Kaloçin, 19 vjeç, banues në Tiranë.
Dy të rinjtë u ndaluan në lagjen nr. 6 të Laçit, ndërsa gjatë kontrollit të automjetit ku udhëtonin, efektivët gjetën kokainë të ndarë në 80 doza të veçanta.
Sipas hetimeve paraprake, dyshohet se lënda narkotike sigurohej prej tyre dhe më pas ndahej në doza për t’u shpërndarë në qytetin e Laçit.
Përveç lëndës narkotike, policia sekuestroi edhe automjetin dhe katër telefona celularë, të cilët do t’i nënshtrohen hetimit.
Materialet e rastit i janë dërguar Prokurorisë pranë Gjykatës së Juridiksionit të Përgjithshëm Lezhë për vijimin e procedurave.
