Në vetëm pak kohë është arritur të sigurohet shuma prej 100 mijë eurosh, e nevojshme për dërgimin e vogëlushit Lukas në Itali, ku do të vijojë trajtimin mjekësor.
Apeli për ndihmë, i shpërndarë gjerësisht në rrjetet sociale, ka sjellë një reagim të menjëhershëm nga qytetarët. Lajmin për sigurimin e shumës e ka bërë të ditur Elvis Naçi.
Lukas po përballet me një situatë të rëndë shëndetësore që prej lindjes. Aktualisht ai ndodhet në reanimacion dhe është i intubuar, për shkak të problemeve serioze me mushkëritë.
Për familjen Vladaj, kjo shumë e mbledhur në një kohë kaq të shkurtër është një shpresë e madhe në një prej momenteve më të vështira të jetës së tyre.
Tashmë, vogëlushi do të niset drejt Italisë, ku familjarët shpresojnë që trajtimi i specializuar t’i japë mundësinë të përmirësohet dhe të rikthehet pranë motrës dhe vëllait.
