Një nga figurat emblematike të futbollit shkodran, Esat Bushati, ndërroi jetë të mërkurën mbrëma në moshën 97-vjeçare. Bushati, i njohur për kontributin e tij të spikatur te Vllaznia dhe Partizani, si dhe për përfaqësimet me dinjitet në ekipin kombëtar shqiptar, mbetet një nga emrat më të respektuar të futbollit të qytetit të tij.
I njohur kryesisht për përgatitjen e tij të jashtëzakonshme fizike, cilësi që konsiderohej si pika e tij më e fortë, Esat Bushati spikati duke luajtur me sukses në pozicionin e mbrojtësit të djathtë. Debutimi i tij me Vllazninë daton në vitin 1947, kohë kur ishte pjesë e një formacioni të konsoliduar me bashkëlojtarë dhe miq të afërt si Muhamet Dibra, si dhe me emra të tjerë të njohur si Kolë Gjoni, Shuajp Keraj, Prengë Gjeloshi, Zyhdi Bakalli, Ali Tepelija, Lutfi Laçja, Ali Kullolli, Beqir Cungu, Buto Smaja, Daut Shkreli, Qamil Medja, Fejzi Rrjolli, Alush Bakalli, Zija Halluni, Shuajp Preza, Beqir Osmani, ndër të tjerë.
Falë aftësive të tij të padiskutueshme si futbollist, Esat Bushati iu bashkua Klubit Sportiv Partizani gjatë periudhës së shërbimit të detyrueshëm ushtarak. Ai u bë një titullar i palëkundur për këtë skuadër, duke kontribuar në fitimin e disa trofeve gjatë qëndrimit të tij atje.
Bushati shënoi gjithashtu suksese të rëndësishme edhe gjatë aktivizimit me ekipin kombëtar, si dhe me Klubin Sportiv Tirana, ku shpeshherë u grumbullua si përforcim për ndeshje të veçanta.
