Arlind Qori, kryetari i Lëvizjes Bashkë, u shpreh se protesta qytetare, tashmë me më shumë se 100 ditë në vazhdim, ka si kërkesë kryesore shpërbërjen e menjëhershme të Kuvendit dhe rrëzimin e qeverisë aktuale të drejtuar nga Edi Rama, për të hapur rrugën ndaj zgjedhjeve të parakohshme, të lira dhe demokratike.
Sipas Qorit, mazhoranca në pushtet e ka humbur plotësisht legjitimitetin për të vijuar drejtimin e vendit.
Qori theksoi se vazhdimësia e këtyre protestave, të cilat po shfaqen si një shembull frymëzues edhe për mediat ndërkombëtare, është rezultat i faktit që lëvizja zhvillohet pa drejtimin e partive politike, por mbështetet nga shoqëria, të rinjtë dhe qytetarët e angazhuar.
Ai sqaroi gjithashtu se Lëvizja Bashkë kontribuon çdo ditë në këtë organizim pa kërkuar protagonizëm politik.
Ndërkohë, duke iu përgjigjur akuzave të deputetëve të mazhorancës për dhunë verbale ose fizike gjatë protestave, Qori deklaroi se “dhuna e vërtetë është ushtruar mbi vetë protestuesit që janë tërhequr zvarrë nga forcat e rendit”.
Kreu i Lëvizjes Bashkë u shpreh në mbrojtje të aktivistëve që janë përballur me figura publike si Iris Luarasi, duke theksuar se ballafaqimi i zyrtarëve me të vërtetat e hidhura të qeverisjes nuk përbën dhunë, por është “thelbi i demokracisë”. Ai shtoi se mazhoranca është mësuar të funksionojë e distancuar nga realiteti, ndaj çdo kërkesë për llogari lidhur me abuzimin dhe korrupsionin e konsiderohet prej saj si “sulm”.
