Një 48-vjeçar nga Shkupi është plagosur me armë zjarri në orët e para të mëngjesit në hyrje të fshatit Haraçinë.
Ngjarja është regjistruar rreth orës 01:50, kur një automjet është afruar pranë 48-vjeçarit dhe prej tij janë qëlluar disa herë në drejtim të tij. Pas sulmit, personat që ndodheshin në makinë janë larguar nga vendi i ngjarjes.
Sipas informacioneve paraprake të policisë, në automjet ndodheshin dy persona. Njëri prej tyre dyshohet se kishte njohje me të plagosurin.
Policia ka nisur hetimet për të zbardhur rrethanat dhe motivin e ngjarjes, si dhe për identifikimin dhe arrestimin e autorëve.
Ndërkohë, burime të televizionit Alsat bëjnë me dije se i plagosuri dyshohet të jetë këngëtari shqiptar Aziz Murati. Gjendja e tij shëndetësore raportohet të jetë stabile.