Ish-futbollisti dhe trajneri i njohur i Vllaznisë, Hysen Dedja, ka reaguar pas vendimit të Lazer Matijas për t’u larguar nga drejtimi i skuadrës së femrave.
Dedja shpreh mbështetjen e tij për Matijan dhe vlerëson punën e bërë prej tij gjatë 12 viteve në futbollin e femrave në Shkodër.
Dedja thekson se dominimi i Vllaznisë në kampionatin shqiptar nuk është arritur rastësisht. Sipas tij, Matija ka investuar për vite me radhë, ndërsa ka ndërtuar një strukturë profesionale, nga përzgjedhja e stafit teknik dhe drejtues deri te afrimi i futbollisteve cilësore.
Ai nënvizon gjithashtu ndikimin që ka pasur Vllaznia në Kombëtaren shqiptare të femrave, duke argumentuar se një pjesë e konsiderueshme e lojtareve të përfaqësueses kanë dalë nga skuadra shkodrane.
Por Dedja ndalet edhe te deklaratat e bëra nga vetë Matija për marrëdhëniet me Federatën Shqiptare të Futbollit. Ai pretendon se, sipas asaj që ka deklaruar presidenti i klubit, ka pasur faktorë që kanë penguar vijimin e dominimit të Vllaznisë.
Në këtë kontekst, Dedja i bën thirrje kryetarit të Bashkisë Shkodër që të ulet me Lazer Matijan dhe të kërkojë një zgjidhje për të ardhmen e ekipit.
Sipas tij, duhet të gjendet një mënyrë për të vijuar bashkëpunimin dhe për t’i garantuar skuadrës mbështetjen e nevojshme, përfshirë edhe atë financiare.
Dedja shpreh keqardhje për mundësinë që një projekt i ndërtuar ndër vite të marrë fund pas largimit të Matijas.
“Na vjen shumë keq që gjithë ajo punë që është ngritur për 12 vite të prishet për një ditë”, shprehet në thelb ish-trajneri i Vllaznisë.
Reagimi i Hysen Dedjes i shtohet debatit të hapur pas largimit të Lazer Matijas, duke rikthyer në vëmendje të ardhmen e Vllaznisë së femrave, një prej skuadrave më të suksesshme të futbollit shqiptar në vitet e fundit.
