Dorëheqja e Lazër Matijës nga drejtimi i Vllaznisë së femrave ka sjellë reagime të shumta në Shkodër dhe në opinionin sportiv. Pas më shumë se një dekade në krye të skuadrës kampione, Matija ka vendosur të largohet nga drejtimi i ekipit.
Në mbrëmje ka reaguar edhe vajza e tij, Matilda Matija, e cila mban detyrën e menaxheres së përgjithshme të Vllaznisë. Përmes një postimi në rrjetet sociale, ajo ka shprehur krenarinë për kontributin e të atit dhe rrugëtimin 13-vjeçar të skuadrës.
Matilda e ka përshkruar largimin e të atit jo thjesht si një dorëheqje nga posti, por si përfundimin e një periudhe që ka qenë pjesë e jetës së familjes së tyre.
Ajo thekson se gjatë këtyre viteve familja ka përjetuar nga afër emocionet, fitoret, humbjet dhe sakrificat e Vllaznisë, ndërsa e cilëson bilancin e 13 kampionateve radhazi si një histori që nuk mund të zhbëhet nga një dorëheqje.
Në reagimin e saj, Matija ka falënderuar lojtaret që kanë veshur fanellën kuqeblu, trajnerët, stafin dhe tifozët shkodranë për mbështetjen ndër vite.
Në fund, ajo i drejtohet babait të saj duke i shprehur publikisht krenarinë për gjithçka që ka bërë dhe ka dhënë për skuadrën.
“Një kapitull mbyllet sot, por ajo që është ndërtuar me kaq shumë punë, sakrificë dhe dashuri, nuk mund të fshihet kurrë”, shkruan Matilda Matija.
