Forcat amerikane kanë sulmuar tre cisterna nafte të lidhura me Iranin, si përgjigje ndaj sulmeve me raketa balistike që u ndërmorën ndaj dy anijeve luftarake amerikane në zonë.
Komanda Qendrore e Shteteve të Bashkuara (CENTCOM), e cila mbulon Lindjen e Mesme, bëri të ditur të shtunën se kishte “paaftësuar përgjithmonë” një cisternë pranë ishullit Kharg në Iran dhe një tjetër pranë Ngushticës së Hormuzit.
Në të njëjtën kohë, CENTCOM raportoi se kishte “shkatërruar plotësisht” cisternën e tretë, e cila ndodhej në Gjirin e Omanit.
Tre cisternat në fjalë janë identifikuar si “Downy”, “Stark 1” dhe “Kylo”.
Po ashtu, CENTCOM bëri të ditur se kishte arritur të “zmbrapste me sukses” disa sulme të ndërmarra nga Trupat e Gardës Revolucionare Islamike, me synim një aeroplanmbajtëse të SHBA-së dhe një shkatërrues të armatosur me raketa të drejtuara.
CENTCOM konfirmoi gjithashtu se nuk pati të lënduar mes personelit amerikan.
Admirali Brad Cooper, komandant i CENTCOM, deklaroi: “Më lejoni t’i jap një mesazh të qartë IRGC-së: Nëse qëlloni mbi dy nga anijet tona, ne do të vendosim një kosto edhe më të madhe ekonomike – duke shkatërruar tre nga tuajat”.
Ai vijoi duke theksuar: “ne nuk do të hezitojmë të mbrojmë forcat amerikane dhe, nëse është e nevojshme, të shkatërrojmë flotën e kufizuar dhe të cenueshme të cisternave të naftës të Iranit”.
Media shtetërore iraniane konfirmoi se një ndër cisternat e saj ishte sulmuar nga raketa amerikane pranë brigjeve të ishullit Kharg.
Siç raporton BBC, këto sulme ndodhin rreth një javë pasi përplasjet mes SHBA-së dhe Iranit kanë rifilluar, pas një periudhe prej një muaji me tensione më të zbutura ndërmjet palëve.
