Deputetja e pavarur Marjana Koçeku, ka reaguar përmes një postimi në rrjetet sociale lidhur me atë që e cilëson si një valë sulmesh online ndaj figurave opozitare dhe faqeve që kanë mbështetur protestat.
Koçeku thote se që prej ditës së djeshme janë mbyllur mbi 200 llogari në Instagram, mes tyre edhe faqja zyrtare e deputetit Agron Shehaj, ajo e aktivistit Gent Progni, si dhe disa faqe të njohura që kanë publikuar dhe mbështetur vazhdimisht protestat.
Sipas saj, zhvillimet vijnë në një kohë kur siguria online dhe mbrojtja e lirisë së shprehjes kanë qenë pjesë e diskutimeve në Forumin e Bledit.
“Qeveria jonë në forume ndërkombëtare e mbron këtë të drejtë me fanatizëm, por tenton me çdo kusht e çdo mjet ta shembë në shtëpinë e vet”, shkruan Koçeku.
Deputetja thotë se për këtë çështje ka raportuar tashmë pranë institucioneve të Bashkimit Europian, duke e konsideruar situatën si një shqetësim për lirinë e shprehjes dhe aktivitetin online në Shqipëri.
