Rreth 100 banorë janë paraqitur gjatë tri ditëve të fundit në spitalin e Fushë-Arrëzit, duke shfaqur simptoma të ngjashme me gastroenteritin.
Sipas mjekut Nikolin Bardhoku, pacientët kanë pasur të vjella, diarre, dhimbje barku dhe nauze. Ata kanë marrë trajtimin e nevojshëm në spital dhe, pas përmirësimit të gjendjes, janë larguar për në banesat e tyre.
Situata ka ngritur shqetësim te banorët e zonës, të cilët dyshojnë se simptomat mund të jenë të lidhura me cilësinë e ujit të pijshëm.
Për rastet është vënë në dijeni Drejtoria e Shëndetit Publik dhe institucionet përgjegjëse. Ndërkohë, janë marrë mostra nga uji i pijshëm, të cilat do të analizohen për të verifikuar nëse ka ndonjë problem me cilësinë e tij.
Shkaku i saktë i shqetësimeve shëndetësore ende nuk është përcaktuar zyrtarisht dhe pritet të qartësohet pas daljes së rezultateve të analizave.
