Është përcjellë sot në banesën e fundit, në një ceremoni private, piktori dhe studiuesi i njohur shqiptar Kujtim Buza. Familjarë, të afërm dhe miq të tij kanë marrë pjesë në ceremoninë e lamtumirës, duke i dhënë nderimet e fundit një prej figurave të rëndësishme të artit pamor shqiptar.
Kujtim Buza u nda nga jeta në mbrëmjen e 27 gushtit 2026. Lajmi i ndarjes së tij nga jeta solli reagime dhe mesazhe ngushëllimi nga bota e artit dhe kulturës shqiptare.
Kush ishte Kujtim Buza
Kujtim Buza i përkiste një familjeje me një traditë të rëndësishme në artet pamore shqiptare. Ai ishte i biri i piktorit të njohur Abdurrahim Buza, një prej emrave të spikatur të pikturës shqiptare.
Gjatë veprimtarisë së tij artistike dhe profesionale, Kujtim Buza u angazhua në pikturë, studimin dhe promovimin e trashëgimisë së artit shqiptar. Kontributi i tij shtrihej përtej krijimtarisë artistike, duke përfshirë edhe veprimtarinë në institucionet e artit dhe kulturës.
Buza ka drejtuar edhe Galerinë Kombëtare të Arteve, duke kontribuar në jetën dhe zhvillimin institucional të artit pamor në Shqipëri. Për kontributin e tij në art, ai u nderua me titullin “Piktor i Merituar” në vitin 1983.
Me krijimtarinë, studimet dhe veprimtarinë e tij profesionale, Kujtim Buza la gjurmë në historinë e artit shqiptar të gjysmës së dytë të shekullit XX dhe në periudhën e mëvonshme.
Ndarja e tij nga jeta shënon humbjen e një tjetër figure të brezit të artistëve dhe studiuesve që i kushtuan një pjesë të rëndësishme të jetës zhvillimit dhe ruajtjes së kulturës shqiptare.
Familja ka zgjedhur që ceremonia e lamtumirës të zhvillohet në mënyrë private.
Ngushëllime ka shprehur dhe ministri Blendi Gonxhe
Me trishtim të thellë morëm lajmin për ndarjen nga jeta të Kujtim Buzës, piktor, studiues dhe një prej emrave të rëndësishëm të artit pamor shqiptar.
Kujtim Buza i përkiste një familjeje që është e lidhur pazgjidhshmërisht me historinë e artit tonë. Bir i Abdurrahim Buzës, një prej themeluesve dhe mjeshtërve të pikturës moderne shqiptare, ai u rrit pranë artit dhe e vijoi këtë trashëgimi me rrugëtimin e vet krijues, duke ndërtuar një profil dhe një kontribut të spikatur në jetën artistike të vendit.
Nga studioja ku dikur pikturonte pranë të atit, te krijimtaria e tij shumëvjeçare, drejtimi i Galerisë Kombëtare të Arteve dhe angazhimi në jetën kulturore të vendit, Kujtim Buza i kushtoi artit një jetë të tërë. Veprat e tij, të pranishme edhe në fondin e Galerisë Kombëtare të Arteve, janë pjesë e një trashëgimie që pasuron kujtesën tonë kulturore.
Ngushëllimet më të sinqerta familjes Buza, të afërmve, miqve, kolegëve dhe gjithë komunitetit të artistëve.
U prehtë në paqe!
