Në Maharashtra të Indisë, një konflikt familjar i shkaktuar nga mospagesa e një kësti telefoni është kthyer në një tragjedi, duke çuar në humbjen e jetës së një 19-vjeçari dhe prindërve të tij.
E gjithë ngjarja rrotullohet rreth Kunal Chandgude, i cili kishte marrë një iPhone me këste dhe i kërkoi të atit ndihmë për të paguar shumën e rradhës. Sipas mediave lokale, refuzimi i babait nxiti një debat të ashpër mes tyre.
Pas konfliktit, Kunal u largua nga shtëpia dhe shkoi në Khavdya Hill, ku qëndroi pranë një shkëmbi të lartë rreth 76 metra.
Kur prindërit, Murlidhar, 48 vjeç, dhe Sangita e mësuan vendndodhjen e të birit, u nxituan atje me shpresë ta bindnin të largohej nga skaji dhe të kthehej në shtëpi. Ata bënë përpjekje për disa orë pranë tij.
Ndërkohë, të tjerë që ndodheshin aty u përfshinë në situatë dhe, sipas raportimeve, disa i ofruan Kunalit ndihmë financiare për këstin e telefonit, me qëllim që ai të largohej nga vendi i rrezikshëm.
Megjithatë, as këto ndërhyrje nuk arritën të ndryshonin rrjedhën e ngjarjes.
Kur babai i afrua djalit në përpjekje për ta ndihmuar, Kunal humbi ekuilibrin dhe ra poshtë shkëmbit. Babai u përpoq ta shpëtonte, por dhe ai përfundoi duke rënë. Pas pak, edhe nëna e tij ra nga lartësia, duke bërë që të tre të humbnin jetën.
Ngjarja, e cila fillimisht u përhap në media si pasojë e një kësti të papaguar të iPhone-it, më pas u shoqërua me detaje të reja. Sipas burimeve të tjera, marrëdhëniet dhe problemet familjare të Kunalit ishin shumë më të thella sesa një pagesë e papërfunduar.
Raportimet tregojnë se në të kaluarën Kunal kishte përjetuar një krizë të rëndë të shëndetit mendor. Rreth një vit më parë, ai kishte tentuar të dëmtonte veten pikërisht në të njëjtën zonë, por kishte arritur t’i shpëtonte rrezikut.
Tragjedia e kësaj familjeje ishte thelluar edhe më parë nga humbja e djalit të madh, i cili kishte ndërruar jetë prej një sëmundjeje, çka kishte ndikuar negativisht në marrëdhëniet mes prindërve, që më pas jetonin të ndarë.
Pas vdekjes së Sangitës, në rrjetet sociale u riaktualizuan postime të mëparshme të saj, ku kishte shprehur “dhimbje dhe zhgënjim për marrëdhëniet njerëzore dhe mungesën e vlerësimit”.
Familjarët e kanë kundërshtuar interpretimin se ngjarja ndodhi thjesht për një telefon. Ata thonë se debati për këstin e telefonit ishte vetëm një shkas, dhe se në prapaskenë ndodheshin vite të tëra vuajtjesh dhe tensionesh familjare.
Ajo që nisi si një grindje për një pagesë telefoni, u kthye në një nga rastet më të rënda të tragjedive familjare: një 19-vjeçar dhe të dy prindërit, që tentuan ta shpëtojnë, humbën jetën në atë që u pa fillimisht si një incident i thjeshtë financiar.
