Një ngjarje tragjike ka goditur shtetin e Montanës në SHBA, ku tetë persona të një familjeje, përfshirë katër fëmijë, u vranë në një sulm me armë zjarri. Sipas të dhënave të autoriteteve dhe dëshmive të të afërmve, Alan Smith, 44 vjeç, dyshohet se është autori i kësaj masakre. Pas vrasjeve, ai i vuri zjarrin shtëpisë ku familja po mblidhej për darkë. Viktimat ishin pjesë e katër brezave të një familjeje, nga një grua në të 90-at që përdorte karrige me rrota deri te një vajzë shtatëvjeçare.
Krimi ndodhi të dielën në mbrëmje, në një shtëpi në periferi të Billings. Policia, pasi mbërriti në vendin e ngjarjes, dëgjoi të shtëna të ardhura nga mbrapa shtëpisë, ndërkohë që pak më vonë banesa u përfshi nga flakët. Më pas, forcat e rendit konfirmuan se tetë persona kishin humbur jetën. Alan Smith, i akuzuar si autori i ngjarjes, kishte pësuar një plagë me armë zjarri të vetëshkaktuar dhe ndërroi jetë më vonë nga plagët e marra.
Mes viktimave gjendeshin Megan Gekier dhe fëmijët e saj, Owen Ireland, 13 vjeç, dhe Chloe Ireland, 7 vjeçe. Po ashtu, humbën jetën edhe Landon Gekier, 15 vjeç, dhe Charlotte Gekier, 12 vjeçe, që ishin fëmijët e bashkëshortit të Megan. Charlotte arriti të telefononte shërbimin e emergjencës 911 gjatë sulmit. “Charlotte ishte heroinë”, tha një mik i familjes, duke theksuar përpjekjen e saj për të shpëtuar të afërmit.
Adam Gekier, babai i Charlotte, deklaroi se kishte marrë informacion nga policia që vajza e tij kishte bërë telefonatën e emergjencës nga brenda shtëpisë. Në atë moment, ai ishte në punë. Pasi dëgjoi në radio për të shtënat dhe nuk arriti të lidhej me familjen, u kthye menjëherë në shtëpi, e cila ishte tashmë e përfshirë nga flakët. Vetëm rreth dy orë më vonë ai u informua që bashkëshortja dhe fëmijët kishin ndërruar jetë.
Familja i kishte kërkuar Smith të largohej
Të afërm të cituar nga Associated Press sqarojnë se Alan Smith kishte jetuar për shumë vite me prindërit në Montana. Vetëm disa javë para tragjedisë, familja ia kishte kërkuar të largohej nga banesa. Ai u kthye të dielën në mbrëmje, në çastin kur familja po mblidhej për darkën e zakonshme javore.
Dëshmitë e të afërmve sugjerojnë se fillimisht Smith qëlloi gjyshen dhe prindërit e tij, më pas motrën dhe katër fëmijët. Pas të shtënave, i vuri flakën banesës dhe tentoi të arratisej para përballjes me forcat e rendit. Brad Ireland, ish-bashkëshorti i Megan Gekier, e përshkroi Smith si një person të tërhequr, që pjesën më të madhe të kohës e kalonte në dhomën e tij para kompjuterit.
Sipas tij, 44-vjeçari nuk kishte pasur më parë episode dhune fizike, ndonëse mund të shfaqej agresiv në komunikim verbal. Hetimet janë ende në zhvillim për të zbardhur arsyet e ngjarjes së rëndë dhe rrethanat që çuan në këtë masakër tronditëse.
