Banorët e Njësisë Administrative Shtiqën, së bashku me banorë të fshatit Nangë të Njësisë Administrative Bicaj, janë ngritur sot në protestë para Bashkisë Kukës, duke kërkuar zgjidhje për mungesën e ujit vaditës.
Ata thonë se prej ditësh përballen me mungesën e ujit për tokat bujqësore, ndërsa pretendojnë se burimet ujore po përdoren për prodhimin e energjisë elektrike nga HEC-et. Sipas banorëve, marrëveshja parashikon që nga data 15 maj deri më 15 shtator uji duhet të jetë i garantuar për vaditjen e tokave bujqësore.
Ata kërkojnë që kjo marrëveshje të zbatohet dhe uji të rikthehet në kanalet vaditëse. Kanali i Shtiqënit mbulon një sipërfaqe prej rreth 820 hektarësh tokë bujqësore.
Aktualisht, rreth 120 hektarë janë të mbjella me misër, jonxhë dhe grurë. Banorët thonë se mungesa e ujit rrezikon të mbjellat dhe të ardhurat e familjeve që merren me bujqësi. Protestuesit kërkojnë ndërhyrjen e institucioneve për zgjidhjen e situatës dhe garantimin e ujit vaditës gjatë gjithë sezonit bujqësor. Ata paralajmërojnë se do të vijojnë protestat nëse kërkesat e tyre nuk marrin një zgjidhje.
