Altin Prenga ofron një perspektivë të re mbi mënyrën si duhet të trajtohet turizmi dhe nocioni i cilësisë së shërbimit në Shqipëri.
Ai vëren se shpesh përdoret fraza “turizëm i varfër”, por thekson se kjo nuk nënkupton domosdoshmërisht turistë që nuk kanë mundësi të shpenzojnë.
Për të ilustruar këtë, Prenga sjell rastin e një kartëmonedhe 500 euro të lënë nga klientët në kutinë e ndihmës për të varfrit; njëkohësisht, ai përmend që në kutinë për stafin ishin mbledhur 80 mijë lekë të reja.
“Për mendimin tim ka vetëm turistë të kujdesshëm, që mendojnë se si t’i shpenzojnë paratë e tyre. Shpërdorimi është budallallëk”, thekson ai.
Prenga shpjegon se një turist mund të paguajë 1 mijë euro për një resort nëse përfitimi i justifikon këto shpenzime, po aq sa mund të paguajë edhe 2 euro për një byrek, nëse cilësia e produktit përkon me vlerën që ofrohet.
“Nuk ka njeri që dëshiron të paguajë për diçka më shumë nga sa vlen”, shton Prenga, duke nënvizuar rëndësinë e përshtatjes së produktit dhe shërbimit me çmimin real.
Kur flet për biznesin e tij, ai pranon se edhe restoranti që drejton has vështirësi gjatë gushtit, siç janë pastërtia e ambientit përreth, gjendja e rrugës dhe akustika në dhoma.
Për këtë arsye, ai sqaron se çmimet përcaktohen në varësi të nivelit të shërbimit dhe kushteve që ofrohen.
“Ja përse miqve të mi nuk u kërkoj 100 euro për person për drekë, por 20 euro, dhe jo 1000 euro për dhomë, por 80 euro”, thekson Prenga.
Ai përmbyll duke theksuar se nëse Shqipëria synon një turizëm të standardeve më të larta me vizitorë të gatshëm të shpenzojnë më shumë, vendi duhet të investojë në përmirësimin e eksperiencës, autenticitetit dhe cilësisë.
“Bëni që atyre t’u duket diçka e çmuar për ta konsumuar dhe përjetuar eksperiencën në vendin tonë”, përfundon ai.
