Një raport i Pentagonit i dorëzuar së fundmi Kongresit amerikan zbulon se gjatë vitit të kaluar, sulmet ajrore të SHBA në Jemen kanë marrë jetën e 396 personave. Dokumenti prej 12 faqesh i Departamentit të Mbrojtjes detajon se mes viktimave numërohen 153 civilë të vrarë dhe 243 të plagosur, të lënduar gjatë ofensivës kundër rebelëve Huthi.
Raporti i është përcjellë Komisionit të Forcave të Armatosura të Senatit të hënën dhe pranon se “me shumë gjasë” pjesë e viktimave civile janë shkaktuar nga operacionet amerikane.
Ndërmes incidenteve të raportuara veçohet bombardimi i kryeqytetit Sanaa më 6 prill, ku u shënuan pesë civilë të vrarë dhe 25 të plagosur. Goditja më e rëndë, sipas Pentagonit, ka ndodhur më 17 prill në portin e Hodeidahut, ku të paktën 80 civilë humbën jetën.
Incidenti në Hodeidah ka ngjallur reagime të ashpra nga organizatat ndërkombëtare të të drejtave të njeriut. Human Rights Watch ka kërkuar që ngjarja të hetohet si një krim i mundshëm lufte, duke shprehur shqetësim për ndikimin e sulmeve amerikane mbi civilët e një vendi që prej vitesh përballet me krizë të rëndë humanitare.
Operacioni amerikan ndaj rebelëve Huthi nisi në mars 2025, pas një urdhri të presidentit Donald Trump, si përgjigje ndaj sulmeve të grupit kundër anijeve në Detin e Kuq. Uashingtoni ka argumentuar se ndërhyrja ishte synuar të siguronte lundrimin ndërkombëtar, ndërkohë që Huthit pohonin se veprimet e tyre në det përbënin shprehje solidariteti me palestinezët në Gaza.
Pentagoni thekson se 15 raste të tjera të lidhura me bombardimet amerikane janë ende në proces verifikimi. Në total, gjatë fushatës, u ndërmorën mbi 1 mijë sulme ajrore, por pavarësisht intensitetit, operacioni nuk arriti t’i ndalonte përfundimisht Huthit dhe u ndërpre në maj të vitit 2025.
