Sipas një raporti të UN Women, gjysma e grave afgane largohen nga banesat e tyre vetëm një ose dy herë gjatë muajit, ndërsa kufizimet e vendosura nga talebanët kanë përforcuar izolimin dhe margjinalizimin e tyre nga jeta publike. Afganistani vazhdon të qëndrojë si i vetmi shtet në botë ku vajzave u ndalohet ndjekja e arsimit të mesëm dhe grave iu mohohet arsimi universitar. UNESCO raporton se prej rikthimit të talebanëve në pushtet në vitin 2021, rreth 2.4 milionë vajza e kanë humbur të drejtën për të ndjekur shkollën e mesme.
Mbi 100 dekrete të lëshuara nga autoritetet talebane kanë kufizuar të drejtat themelore të grave dhe vajzave. UN Women thekson se përafërsisht 75% e grave të pyetura shprehin pasiguri për të dalë jashtë pa shoqërinë e një të afërmi mashkull.
Këto kufizime kanë pasur ndikim të ndjeshëm edhe në shëndetin mendor të grave. Sipas raportit, 7 nga 10 gra e përshkruajnë mirëqenien e tyre psikologjike si “të keqe” ose “shumë të keqe”, duke theksuar ndjenjën e izolimit dhe mungesën e perspektivave.
Përveç kësaj, gratë thuajse janë tërësisht të përjashtuara nga puna. Vetëm 7% e grave janë të punësuara, ndërsa kjo shifër arrin në 84% për burrat. Nga ana tjetër, autoritetet talebane hedhin poshtë akuzat për shkelje të të drejtave të grave. Një zëdhënës i Ministrisë për Përhapjen e Virtytit dhe Parandalimin e Veseve deklaroi se gratë afgane gëzojnë të drejtat e tyre dhe se situata po shkon në “drejtim pozitiv”.
UN Women vlerëson se situata në Afganistan përbën krizën më të rëndë të të drejtave të grave në nivel global.
