Specialistët e Interpol Tiranës, në koordinim me partnerët ndërkombëtarë, kanë përmbyllur me sukses ekstradimin e dy individëve të shpallur në kërkim nga drejtësia, në kuadër të dy operacioneve të veçanta të zhvilluara mes Shqipërisë, Italisë dhe Gjermanisë.
Autoritetet shqiptare kanë dorëzuar për në Itali shtetasin 42-vjeçar Armando Valchizan, i cili njihet edhe me emrat Armando Dervishi, Altin Dervishi, Armando Gheorghe dhe Martin Dervishi.
Policia informon se në vitin 2023, Valchizan u dënua nga Gjykata e Pordenones në Itali me një periudhë burgimi prej 5 vitesh e 9 muajsh, për akuzat “Vjedhje në rrethana rënduese” dhe “Emigracion i paligjshëm”.
Rasti i dytë përfshin ekstradimin nga Gjermania drejt Shqipërisë të një shtetasi venezuelian, G. C., i njohur edhe si Y. D., 33 vjeç. Ky person u shpall në kërkim pas vendosjes nga Gjykata e Tiranës, në vitin 2025, të masës së sigurisë “Arrest në burg” ndaj tij.
Kundër shtetasit nga Venezuela rëndojnë akuzat për “Trafikimi i personave të rritur” dhe “Shfrytëzimi i prostitucionit”.
Këto ekstradime u mundësuan falë bashkëpunimit ndërmjet Interpol Tiranës dhe autoriteteve të Italisë dhe Gjermanisë, si pjesë e procedurave për sjelljen para drejtësisë të personave në kërkim ndërkombëtar.
