Një pilot i kompanisë Air India është përfshirë në një incident ajror që ka marrë një kthesë të re, pasi ka rezultuar pozitiv për marihuanë në testin fillestar të kryer pas ngjarjes. Ngjarja ndodhi gjatë një fluturimi që lidhte Phuket me Delhin, ku avioni humbi papritur afro 300 metra lartësi.
Mediat televizive në Indi kanë raportuar mbi zbulimin e përdorimit të drogës nga piloti, ndërsa hetimet për incidentin që çoi në plagosjen e 17 vetave vijojnë. Nga pasagjerët, 13 u plagosën, së bashku me katër anëtarë të ekuipazhit.
Ngjarja u shënua javën e kaluar, kur një Airbus A320neo që po fluturonte nga Phuket, një destinacion popullor turistik në Tajlandë, drejt Delhit, pësoi një “ndryshim të papritur të lartësisë” mbi shtetin indian Odisha.
Avioni kishte në bord gjithsej 137 pasagjerë dhe tetë anëtarë të ekuipazhit. Pavarësisht lëkundjes së fortë, mjeti arriti të bëjë një ulje të sigurt në aeroportin e Delhit.
Sot, drejtori ekzekutiv i Air India, Campbell Wilson, u thirr nga Ministria e Aviacionit Civil të Indisë për të dhënë sqarime në lidhje me incidentin.
