Ministri i Mbrojtjes, Ermal Nufi, dhe Besfort Lamallari kanë shkuar sot në Krujë për të monitoruar nga afër situatën emergjente të shkaktuar nga zjarri që ka përfshirë prej pasdites zonën e Abazës.
Ermal Nufi njoftoi se dyshimet janë që zjarri është nxitur nga ndërhyrja e qëllimshme e njerëzve, ndërsa theksoi se operacioni për shuarjen e tij po organizohet në mënyrë të bashkërenduar si nga toka, ashtu edhe nga ajri.
“Në zonën e Abazës në Krujë, bashkë me kolegun Besfort Lamallari, Drejtorin e AKMC dhe Drejtorin e Përgjithshëm të Zjarrfikësve duke ndjekur nga afër situatën e zjarrit të shkaktuar fatkeqësisht nga dora e njeriut.
Që prej pasdrekes, po punohet intensivisht me mbështetje nga ajri me 3 helikopterë të Forcës Ajrore, bashkë me forcat operacionale të strukturave vendore”.
Ministri u shpreh gjithashtu falënderues ndaj pilotëve të Forcës Ajrore dhe zjarrfikësve që po përpiqen të izolojnë vatrat e zjarrit dhe të mbrojnë shtëpitë e rrezikuara nga flakët.
“Shumë mirënjohje dhe respekt për pilotët e forcës ajrore dhe efektivët MZSH Krujë, Kamëz, Tiranë dhe Vorë, të cilët po punojnë pa ndërprerje për izolimin e vatrës dhe mbrojtjen e banesave të rrezikuara.
Për shkak të terrenit të thepisur dhe vështirësisë së ndërhyrjes nga toka, operacioni po zhvillohet në mënyrë të koordinuar nga toka dhe ajri, me synim vënien sa më shpejt nën kontroll të zjarrit”, shkruan Nufi.
