Shefi i sigurisë së Iranit ka shpallur se Ngushtica e Hormuzit do të mbetet e mbyllur derisa Shtetet e Bashkuara të Amerikës të ndryshojnë, sipas tij, politikat armiqësore dhe të përmbushin një sërë kërkesash të vendosura nga Teherani.
Mohammad Bagher Zolghadr, sekretar i Këshillit Suprem të Sigurisë Kombëtare të Iranit, theksoi në një deklaratë për mediat se Uashingtoni duhet të “korrigjojë sjelljen e tij” përpara se të lejohet rihapja e këtij korridori jetik detar.
Zolghadr paraqiti gjashtë kushte kyçe përpara SHBA-ve: ndaljen e “kërcënimeve kundër udhëheqësit suprem të Iranit”, ndalim të përhershëm të veprimeve ushtarake amerikane kundër Iranit dhe aleatëve rajonalë, tërheqjen e trupave detare dhe ajrore amerikane, të cilat ai i quajti “pjesë e bllokadës ndaj Iranit”, dhënien e kompensimeve për dëmet e pësuara nga konfliktet e fundit, heqjen e sanksioneve, si dhe lirimin e aktiveve të ngrira iraniane.
Sipas Zolghadr, këto kushte pasqyrojnë dëshirat e popullit iranian, duke iu referuar protestave të zhvilluara përgjatë gjashtë ditëve të fundit në të gjithë vendin.
“Këshilli i Lartë i Sigurisë Kombëtare nuk do të tërhiqet nga këto kërkesa, qoftë në luftë apo në negociata”, tha ai.
Ndërkohë, zëdhënësi i ushtrisë iraniane, gjeneral brigade Mohammad Akraminia, deklaroi se “rendi iranian” në Ngushticën e Hormuzit është “i pakthyeshëm” dhe paralajmëroi SHBA-të se “nuk kishin zgjidhje tjetër veçse të pranonin realitetin ekzistues” përndryshe do të përballeshin me “kosto shumë më të mëdha se më parë”.
Këto qëndrime vijnë në një kohë kur negociatat për të përcaktuar të ardhmen e lundrimit në Ngushticën e Hormuzit mbeten të bllokuara.
