Mbi 1,699 persona janë detyruar të largohen nga shtëpitë e tyre si pasojë e shpërthimit të vullkanit Fuego në Guatemala.
Që prej së hënës, aktiviteti vullkanik është intensifikuar ndjeshëm, duke prodhuar llavë dhe re të dendura hiri që vazhdojnë të përfshijnë zonën përreth.
Mbi 29 mijë banorë janë prekur nga rënia e hirit vullkanik. Për shkak të këtyre kushteve, autoritetet kanë lëshuar paralajmërime edhe për industrinë e aviacionit, pasi hiri ka ndikuar në hapësirën ajrore përreth perëndimit dhe jugperëndimit të vullkanit.
Tre rajone kanë shpallur nivelin maksimal të alarmit dhe kërkojnë evakuime të tjera. Në disa raste, ekipet e emergjencës janë përballur me rezistencë nga banorët, të cilët hezitojnë të largohen nga frika për grabitje.
Deri në këtë moment, autoritetet nuk raportojnë dëme në banesa ose rrjedhje llavë drejt zonave të banuara, por tymi dhe hiri kanë ndikuar në 18 komunitete.
Procesi mësimor është ndërprerë në disa zona, ndërkohë që banorëve dhe vizitorëve u është bërë thirrje të evitojnë shpatet e vullkanit dhe zonat e tjera të rrezikuara.
Shpërthimi masiv i Fuegos në vitin 2018 shkaktoi vdekjen e mbi 200 personave, shumë prej të cilëve humbën jetën kur rrjedhat piroklastike përfshinë me shpejtësi luginën Las Lajas.
