Deputetja e pavarur Marjana Koçeku ka reaguar ndaj deklaratave të deputetit Erion Braçe për bujtinën e saj në zonën e Lumit të Shalës.
Përmes një postimi në rrjetet sociale, Koçeku pranon se objekti nuk është i pajisur me dokumentacionin përkatës, por thekson se kjo situatë është pasojë e mungesës së zgjidhjeve nga institucionet dhe jo e mungesës së dëshirës së banorëve për t’u formalizuar.
“Po, nuk i kam dokumentet. Por a është kjo sepse banorët nuk kanë dashur t’i bëjnë, apo sepse shteti ka dështuar të krijojë mundësinë për t’i pajisur me to?”, shkruan ajo.
Në reagimin e saj, Koçeku i kujton Braçes angazhimin e gjatë në politikë dhe kërkon që vëmendja të përqendrohet te përgjegjësia e institucioneve për problemet e pazgjidhura të zonës.
