Parisi është shpallur destinacioni kryesor për ushqimin në rrugë në botë, sipas një studimi të sapo publikuar, i cili ka analizuar skenën gastronomike të 100 qyteteve më të vizituara në glob.
Studiuesit nga Radical Storage kanë hulumtuar 6,897 pika të shitjes së ushqimit në rrugë, duke marrë në konsideratë cilësinë, larmishmërinë e kuzhinave, çmimet, si edhe alternativen për dieta vegjetariane, vegane dhe për persona me intolerancë ndaj glutenit.
Rezultatet e studimit kanë nxjerrë kryeqytetin francez në krye të listës me 7.2 pikë nga 10 të mundshme. Nga 401 restorante të shqyrtuara në Paris, rreth 69.1% kanë arritur të marrin të paktën katër yje, ndërkohë që qyteti shënon një dendësi prej 3.82 shitësish të ushqimit në rrugë për kilometër katror.
Athina është pozicionuar në vendin e dytë me 6.9 pikë, ndërsa Selaniku renditet i treti me 6.1 pikë. Athina është vlerësuar për larminë e kuzhinave që ofron, ndërsa Selaniku dallohet për përqindjen e lartë të ushqimeve me çmime të arsyeshme.
Qyteti i Rodosit ka fituar vlerësimin më të lartë për ushqimin në rrugë, pasi 82% e shitësve të analizuar kanë marrë katër yje ose më shumë. Ndërkaq, Londra ka dalë në krye për gamën më të gjerë të kuzhinave, duke ofruar ushqime nga 39 lloje të ndryshme kuzhinash.
Ndër dhjetë qytetet më të mira në botë për ushqimin në rrugë gjenden gjithashtu Barcelona, Roma, Hanoi, Budapesti dhe Amsterdami.
