Një drejtues mjeti lundrues është gjobitur me 500 mijë lekë të rinj dhe mjeti i tij është sekuestruar, pasi u kap duke lundruar me shpejtësi brenda zonës së sigurisë të rezervuar për pushuesit në bregdetin e Shëngjinit.
Policia e Shtetit njofton se shërbimet e Policisë Kufitare dhe Njësisë Policore Detare, në bashkëpunim me Drejtorinë Vendore të Policisë Lezhë, identifikuan një mjet lundrues që kishte hyrë në zonën ku lundrimi është i ndaluar, duke vënë në rrezik jetën dhe sigurinë e pushuesve në det.
Pas kryerjes së kontrollit, drejtuesi i mjetit, shtetasi me inicialet D. M., u penalizua me një gjobë prej 500 mijë lekësh të rinj, ndërsa mjeti i tij u bllokua nga autoritetet.
Policia e Shtetit ka shprehur mirënjohje për qytetarët që kanë bërë denoncime dhe theksoi se çdo shkelje që rrezikon sigurinë e pushuesve do të trajtohet me përparësi dhe do të ndëshkohet konform ligjit.
Autoritetet iu bëjnë thirrje të gjithë drejtuesve të mjeteve lundruese të respektojnë perimetrat e sigurisë dhe rregullat e lundrimit, duke paralajmëruar se kontrollet përgjatë bregdetit do të vazhdojnë gjatë gjithë sezonit turistik.
