Një zjarr i fuqishëm ka përfshirë zonën e Pyllit të Sodës në Zvërnec, duke u përkeqësuar ndjeshëm dhe duke i bërë të vështira përpjekjet për shuarjen e tij. Rreziku është rritur për banesat, bizneset dhe sipërfaqet pyjore në afërsi të vatrës së zjarrit.
Temperaturat e larta së bashku me erërat e forta kanë ndihmuar përhapjen e flakëve. Në terren, forcat zjarrfikëse dhe strukturat e emergjencës po punojnë për të izoluar zjarrin dhe për të parandaluar avancimin e tij. Në operacion janë përfshirë gjithashtu banorë vendas dhe pushues që ndodhen në zonë.
Raportimet nga vendngjarja tregojnë se situata mbetet e tensionuar, pasi zjarri po shtrihet drejt zonave të mbuluara me bimësi të dendur, duke kërcënuar objekte të shumta pranë vatrës.
Autoritetet u kërkojnë qytetarëve të qëndrojnë larg zonës së prekur dhe të ndjekin udhëzimet e ekipeve që po punojnë në vendngjarje, ndërsa operacioni për shuarjen e zjarrit vijon ende.
