Elon Musk, drejtuesi ekzekutiv i Tesla-s, ka dalë me një parashikim të pazakontë për të ardhmen ekonomike, duke sugjeruar se paraja mund të bëhet e parëndësishme deri në vitin 2036.
Musk argumenton se zhvillimi i avancuar i inteligjencës artificiale dhe robotëve humanoidë pritet të sjellë ndryshime rrënjësore në shoqëri dhe ekonomi.
“Për çfarë ju duhet paraja? Ju nevojitet për mallra dhe shërbime: ushqim, strehim, transport dhe argëtim”, tha Musk, duke shpjeguar se nëse robotët dhe sistemet e inteligjencës artificiale arrijnë të prodhojnë më shumë mallra dhe shërbime sesa njerëzit mund të konsumojnë, atëherë nevoja për para mund të zvogëlohet ndjeshëm.
Prej vitesh, Musk ka theksuar se robotët dhe AI do të jenë faktorë thelbësorë për të ardhmen. Sipas tij, makinat autonome dhe robotët me formë njerëzore do të mund të marrin përsipër shumicën e detyrave fizike dhe industriale, duke kontribuar në një rritje të madhe të prodhimit në nivel global.
Megjithatë, specialistët e ekonomisë dhe teknologjisë nuk ndajnë të gjithë të njëjtin mendim. Pavarësisht automatizimit të lartë, shumë analistë vënë theksin mbi probleme të tilla si ndarja e pasurisë, pronësia mbi teknologjinë dhe mënyra se si njerëzit do të mund të përfitojnë nga burimet ekzistuese.
Qëndrimi i Musk-it ka nxitur edhe një herë debatin mbi efektet afatgjata të inteligjencës artificiale dhe nëse përparimi i saj do të çojë drejt një ekonomie ku funksioni tradicional i parasë transformohet.
