Pas ndërprerjes së furnizimit, uji është rikthyer në orët e para të mëngjesit të së mërkurës në Shkodër, por në shumë zona ai vijon të jetë i papërshtatshëm për konsum.
Sipas denoncimeve të qytetarëve, edhe rreth orës 15:45 uji që del nga rubinetat është me ngjyrë kafe dhe i ndotur, duke ngritur shqetësime serioze për cilësinë dhe sigurinë e tij.
Deri në këto momente, Ndërmarrja e Ujësjellës Kanalizime Shkodër nuk ka dhënë një sqarim zyrtar mbi shkakun e situatës dhe as një njoftim nëse uji është i sigurt për t’u përdorur. Mungesa e informacionit ka shtuar shqetësimin e banorëve, të cilët kërkojnë transparencë dhe masa të menjëhershme për garantimin e furnizimit me ujë të pastër dhe të pijshëm.
