Kryeministri Edi Rama pritet të jetë nesër në Theth, në një vizitë që vjen rreth një vit pas aksionit të qeverisë për prishjen e rreth 100 objekteve pa leje në këtë zonë turistike.
Ndërhyrja e një viti më parë shkaktoi reagime të shumta, ndërsa u cilësua nga qeveria si pjesë e përpjekjeve për lirimin e hapësirave publike dhe rregullimin e zhvillimit në zonat alpine.
Sipas burimeve, institucionet përgjegjëse janë njoftuar për mbërritjen e kreut të qeverisë dhe po përgatiten masat organizative për vizitën. Ende nuk është bërë publike axhenda zyrtare, por një nga temat që pritet të diskutohet është Paketa e Maleve dhe zhvillimi i turizmit në zonat malore.
Gjatë qëndrimit në Theth pritet të shihet nëse Rama do të zhvillojë takime me banorë dhe operatorë turistikë të zonës, si dhe nëse do të ketë deklarata për projektet e ardhshme në Alpet shqiptare.
