Ekipi Kombëtar Shqiptar i gjimnastikës ka marrë pjesë në “EuroGym 2026”, festivalin më të madh evropian për të rinj në këtë sport, i cili po mbahet në Pistoia, Itali. Ky aktivitet ka bashkuar 4218 gjimnastë nga 21 vende të ndryshme të Evropës, duke ndihmuar në promovimin e sportit, miqësisë dhe shkëmbimit kulturor përmes performancave dhe aktiviteteve të përbashkëta.
Ceremonia e hapjes u nderua me prezencën e Leonard Lulajt, Presidentit të Federatës Shqiptare të Gjimnastikës, dhe Fidel Yllit, Presidentit të Komitetit Olimpik Kombëtar Shqiptar.
Ekipi Kombëtar udhëhiqet nga trajneri Izmir Kashi dhe përfshin gjimnastet: Gresa Dragani, Klea Marku, Gjoela Neziri, Amatia Lleshi, Merili Islami, Mishela Bitanji, Angela Preka, Sara Moleci, Luara Dopalaj dhe Maria Zefi.
“EuroGym 2026” sjell së bashku mijëra sportistë të rinj nga shumë vende evropiane dhe radhitet si një festival gjimnastikash, i cili vendos theksin mbi bashkëpunimin, performancën dhe frymën sportive, më shumë se sa mbi konkurrencën.
