Gazetari sportiv Gjergj Stefa ka reaguar pas disfatës së thellë 5-0 të Vllaznisë ndaj Malishevës në turin e parë të UEFA Conference League, duke e cilësuar paraqitjen e skuadrës shkodrane si një nga momentet më të dobëta të viteve të fundit.
Në një intervistë, Stefa u shpreh se mënyra se si kuqeblutë u paraqitën në Europë tregon mungesë përgatitjeje dhe probleme serioze në organizimin e klubit.
Sipas tij, nuk është hera e parë që Vllaznia pëson eliminime të rënda në arenën ndërkombëtare, duke kujtuar edhe humbjen 4-0 ndaj Valurit disa sezone më parë.
“Një humbje 5-0 ndaj Malishevës tregon se skuadra ka hyrë në këtë kompeticion pa përgatitjen e duhur. Organika e klubit lë shumë për të dëshiruar dhe situata është mjaft shqetësuese”, tha ai.
Stefa komentoi edhe mënyrën e administrimit të klubit, duke theksuar se presidenti Alban Xhaferi nuk e financon Vllazninë me fondet e tij personale, por menaxhon buxhetin që sigurohet nga sponsorë të ndryshëm.
“Albani është në një pozicion të vështirë, pasi nuk e drejton klubin me paratë e veta. Ai administron fondet që vijnë nga sponsorët dhe në këto kushte nuk mund të bëjë gjithçka i vetëm”, u shpreh gazetari sportiv.
Deklaratat e Stefës vijnë në një moment të vështirë për Vllazninë, ndërsa humbja ndaj Malishevës ka shtuar kritikat dhe pakënaqësitë e tifozëve kuqeblu.
