Vllaznia e futbollit të femrave vijon të jetë aktive në merkaton e verës, duke afruar një tjetër emër me peshë në përbërje. Klubi kuqeblu ka siguruar shërbimet e portieres së Kombëtares shqiptare, Antigoni Hyska.
Gardiania, e cila sezonin e kaluar ishte pjesë e Gramshit, ka mbyllur bashkëpunimin me këtë ekip dhe tashmë i është bashkuar Vllaznisë. Ajo është duke u stërvitur me skuadrën në fazën përgatitore që po zhvillohet në Pukë.
Hyska numëron një karrierë të pasur në futbollin e femrave, ku për shumë sezone ka mbrojtur portën e Apolonisë, ndërsa prej vitesh është pjesë e rregullt e Kombëtares shqiptare, duke u konsideruar si një nga portieret më me eksperiencë në vend.
Afrimi i saj shihet si një përforcim i rëndësishëm për ekipin e drejtuar nga trajneri Leka, i cili tashmë ka në dispozicion një alternativë cilësore më shumë në repartin e portës.
Pas këtij transferimi, vëmendja e Vllaznisë është përqendruar te sfidat e turit të dytë të UEFA Women’s Champions League. Ndeshjet do të zhvillohen në fillim të muajit gusht në Qipro, ku skuadra shkodrane do të synojë të sigurojë kualifikimin në fazën e tretë të kompeticionit europian.
