Autoriteti Kombëtar i Ushqimit (AKU) ka lejuar rikthimin në aktivitet të kompanisë së kateringut “Sori-Al”, pas masës së pezullimit të marrë në qershor, pas dyshimeve për helmimin e 64 studentëve të Akademisë së Sigurisë.
Sipas AKU-së, analizat laboratorike të 33 mostrave të marra nga ushqimet e përgatitura për drekë dhe darkë, si dhe nga ambientet dhe pajisjet e punës, kanë rezultuar brenda normave të sigurisë ushqimore.
Pas verifikimeve të kryera dhe rezultateve konforme të analizave të vetëkontrollit nga subjekti, si dhe kontrolleve të mëtejshme nga inspektorët e AKU-së, është vendosur zhbllokimi i aktivitetit të kompanisë “Sori-Al”.
AKU thotë se kompania lejohet të vijojë aktivitetin e gatimit dhe furnizimit me ushqime në ambientet e kuzhinës brenda Garnizonit “Skënderbej”, Tiranë.
Më herët gjatë muajit maj, u helmuan edhe 52 studentë të tjerë të Akademisë së Sigurisë.
