Administrata e presidentit Donald Trump ka miratuar rregulla të reja që kufizojnë kohëzgjatjen e vizave për studentët e huaj, vizitorët e programeve të shkëmbimit kulturor dhe gazetarët.
Sipas rregullores së re të Departamentit të Sigurisë Kombëtare (DHS), vizat e studentëve (F) dhe të shkëmbimit (J) do të kenë një vlefshmëri maksimale prej katër vitesh, ndërsa vizat për gazetarët (I) do të jenë të vlefshme deri në 240 ditë. Për shtetasit kinezë, kjo periudhë do të jetë vetëm 90 ditë.
Pas përfundimit të afatit, mbajtësit e këtyre vizave do të duhet të aplikojnë për zgjatje ose të dalin nga SHBA dhe të hyjnë sërish për të marrë një leje të re.
Sipas DHS, ndryshimet synojnë të forcojnë kontrollin mbi qëndrimin e të huajve në SHBA, duke argumentuar se është rritur ndjeshëm numri i vizitorëve dhe se ka raste të shumta të personave që kanë qëndruar në vend përtej afatit të lejuar.
Rregullorja pritet të hyjë në fuqi 60 ditë pas publikimit, në varësi të procesit të shqyrtimit nga Kongresi.
