Gjatë mbledhjes së Komisionit për Nismat Qytetare, deputeti i opozitës Erald Kapri kërkoi shpjegime përse SPAK nuk ka nisur hetime për pretendimet e banorëve të Rrjollit, të cilët kundërshtojnë ndërtimin e një resorti nga ndërtuesi dhe botuesi Bashkim Ulaj, duke e akuzuar se u ka grabitur pronat.
“Kam një kërkesë nga banorët e Rrjollit. Dosja e tyre është si e Zvërnecit, pse nuk keni nisur hetimet?”, u shpreh Kapri.
Në përgjigje, Klodian Braho tha se nuk dëshironte të ndalej në raste konkrete, duke theksuar se kompetencat e SPAK nuk përcaktohen nga kërkesa e kallëzuesve.
“Nuk dua të ndalem në raste konkrete. Kompetencat e institucionit nuk përcaktohen nga dëshira apo vullneti i kallëzuesit, por nga rrethanat faktike. Nëse personat e caktuar nuk janë dakord, kanë të drejtën e tyre të ndjekin rrugën ligjore”, deklaroi Braho.
Banorët e Rrjollit kanë protestuar në mënyrë të vazhdueshme gjatë muajve të fundit, duke pretenduar se pronat e tyre janë përvetësuar në mënyrë të paligjshme dhe duke kërkuar ndërhyrjen e SPAK për hetimin e çështjes.
