Deputetja e Partisë Socialiste, Marjana Koçeku, ka reaguar publikisht në mbështetje të gazetarit Gjergj Erebara, pas deklaratave të kryetarit të Grupit Parlamentar të PS-së, Taulant Balla, ndaj tij.
Përmes një statusi në rrjetet sociale, Koçeku e cilëson BIRN si një nga mediat më serioze dhe më të besueshme në Shqipëri, duke vlerësuar rolin e gazetarisë investigative në zbardhjen e çështjeve me interes publik.
“Sulmi publik i kryetarit të Grupit Parlamentar të PS-së ndaj gazetarit Gjergj Erebara nuk është thjesht një përplasje me një individ. Është një mesazh i gabuar ndaj çdo gazetari dhe qytetari që ushtron profesionin me pavarësi dhe integritet”, shkruan Koçeku në reagimin e saj.
Ajo thekson se mënyra se si pushteti sillet me kritikët e tij është një nga treguesit e demokracisë, ndërsa shton se “fjala e lirë nuk hidhet në kosh dhe nuk mund të intimidohet”.
Në fund të reagimit, Koçeku shpreh solidaritet me gazetarin Gjergj Erebara dhe me çdo media që, sipas saj, i shërben të vërtetës dhe interesit publik.
Reagimi i saj vjen pas polemikave të krijuara nga një postim i Taulant Ballës ndaj gazetarit të BIRN, duke nxitur debat mbi lirinë e medias dhe raportin mes politikës dhe gazetarëve në vend.
